9. nóvember 2001 08:27

From Survival to Recovery (Frá björgun til bata):

Loforð Al-Anon

Ef við gefum okkur sjálfviljug á vald andlegum reglum reynslusporanna, mun líf okkar gerbreytast. Við verðum þroskaðir, ábyrgir einstaklingar sem geta glaðst í ríkulegum mæli, upplifað undur og fullnægju.

Þó svo að við verðum kannski aldrei fullkomin munu stöðugar, andlegar framfarir opna okkur gríðarlega mikla möguleika. Við uppgötvum að bæði erum við ástar verð og getum elskað. Við elskum aðra án þess að týna sjálfum okkur og við lærum að þiggja ást á móti. Sýn okkar, sem eitt sinn var þokukennd og ruglingsleg, skýrist og við verðum fær um að skynja raunveruleikann og finna sannleikann. Kjarkur og samkennd koma í stað óttans. Við verðum fær um að hætta á að gera mistök til að þróa með okkur nýja og áður óþekkta hæfileika.
 
Við munum eignast von, sama hversu illa leikin og smánuð við vorum orðin, sem við getum deilt með öðrum. Við förum að upplifa og þekkja víðáttur tilfinninga okkar en við verðum ekki þrælar þeirra.
Leyndarmálin munu ekki lengur hlekkja okkur við skömm. Um leið og við öðlumst hæfileikann til að fyrirgefa okkur sjálfum, fjölskyldum okkar og umheiminum, mun tækifærum okkar fjölga. Með reisn munum við standa með sjálfum okkur en ekki í vegi fyrir náunganum. Æðruleysi og friður mun öðlast merkingu hjá okkur um leið og við leyfum lífi okkar, og lífi þeirra sem við elskum, að streyma fram dag frá degi í guðdómlegu áreynsluleysi, í jafnvægi og með tign. Þar sem við erum ekki lengur óttaslegin munum við uppgötva að við getum leyft okkur að njóta þversagna lífsins, leyndardóma þess og fyllast lotningu.
Við munum hlæja meira. Í stað óttans munum við sjálfkrafa öðlast trú og þakklæti þegar við gerum okkur ljóst að æðri máttur er að gera fyrir okkur það sem við getum ekki gert fyrir okkur sjálf.
 
Úr „Survival to Recovery", bls. 269-270, höfundarréttur 1994 Höfuðstöðvar Al-Anon fjölskyldudeilda.
Þýð KS